Mar 9th 2008rasikmeghaniશુષ્ક લાંબા મારગે
તમે ફુલ સમ હસીને કરી હર પળો સુધાની
અમે ખાર સમ રડીને કરી ઝેર જિંદગાની
અમે રંગો સઘળા રંગી કરી શ્યામ જિંદગાની
તમે એક રંગ રૂપે સદા ગાળી એ મજાની
કદી પૂર્વજોને છોડી તેં ગુમાવી બેખબર જયાં
હજી એજ માર્ગ મળશે, છબી તારી ભવ્યતાની
અમે આપણા પરાયા થતા એમ પળમાં જોયા
હતી જિંદગી આ જાણે સદા એમના વિનાની
સહી વેણ કડવા એના, રહ્યો મૌન એટલે હું
અહીં આબરૂ ‘રસિક’ની હતી આપણા બધાની
Mar 9th 2008rasikmeghaniશુષ્ક લાંબા મારગે
મારા વજૂદ પર ન જા, છો આજ પસ્ત છું
ભેદીને કાળ ચક્ર જો, એમાં સમસ્ત છું
તૂટી ગયેલ કાચમાં ચહેરાને જોઉં કેમ
વિખરી ગયેલ કટકા મહીં અસ્તવ્યસ્ત છું
બાજી ન કોઈ જીતી શકયું મુજથી એટલે
મારા જ હાથથી હવે મારી શિકસ્ત છું
ખાલીપણાનો સંગ હમેંશા છે એટલે
મારા કદમના ધાકથી ખુદ હું જ ત્રસ્ત છું
તારી વિશાળતાને ભલા કયાં અનુભવું
હું તો અનાદીકાળથી મારામાં મસ્ત છું
ભીતરમાં ચૂર ચૂર છું, હું તે છતાં ‘રસિક’
દેખાવમાં બધાયને લાગ્યો દુરસ્ત છું
Mar 9th 2008rasikmeghaniશુષ્ક લાંબા મારગે
એ હસીને લખો કે રડીને લખો
નોખ નોખા જખમ સૌ કરીને લખો
ધીમે ધીમે લખો સાચવીને લખો
ટૂંકમાં સારા અક્ષર કરીને લખો
કોઈના દિલની વાતોને વાંચો અગર
આપણા પર નજર પણ કરીને લખો
રોજ કાગળ તમે ના લખો તે છતાં
દિલની વાતો મહીને મહીને લખો
બાદશાહીની જાહોજલાલી બધી
ચાર દીવાલ વચ્ચે ચણીને લખો
મારૂં સળગે છે કાં રોમ જેવુ નગર
દૂર વાગી રહી વાંસળીને લખો
જિંદગીની હકીકત પિછાંણી ‘રસિક’
ઝેરના ઘૂંટડા કડવા પી ને લખો
Mar 8th 2008rasikmeghaniશુષ્ક લાંબા મારગે
આંખ ભીની યાદ નીંગાળો હવે
ભીંત પરના ચિત્ર ખંખાળો હવે
ધીમે ધીમે આપણા સંબંધમાં
કેમ વધતો જાય વચગાળો હવે
સૌ સમયની પાંખ લઈ ઊડી ગયા
એટલે ખાલી થયો માળો હવે
ખાળવા હો જો તિમિરના વાદળો
કોડવાળા કોડિયાં બાળો હવે
રિક્તતાને ભીંત પરથી ટાળવા
ટોડલા પર યાદ ટીંગાળો હવે
પારધી તુજ નામે પણ ખાલી થશે
ચકલીઓનો ચિત્રમાં માળો હવે
વેદનાની વાટ બાળી રાતભર
મીણબતીને ન ઓગાળો હવે
ભીડમાં ખોવાઈ જા એની ‘રસિક’
એટલીયે છોડ જંજાળો હવે
Mar 7th 2008rasikmeghaniશુષ્ક લાંબા મારગે
તારી ચાહતમાં જો સમાયો છું
ખુદના માટે થયો પરાયો છું
રાત લાંબી છે ને તિમિરમય છે
ઝબકી ઝબકી હું ઓલવાયો છું
સાથ તારો ને મારો એમજ છે
જિંદગીભર તારો પડછાયો છું
મારી આંખો ને સ્વપ્ન એનું છે
રાત એ રીતથી જગાયો છું
મારા પોતાના ચહેરા જોઈ બધે
ઘાવ પામીને મુસ્કુરાયો છું
જિંદગી એમ આખી વીતી છે
ચહેરા જોઈને ભોળવાયો છું
પ્રેમ દીપક જલાવી ચાલ્યો ‘રસિક’
સૌના દિલમાં પછી સમાયો છું
Mar 6th 2008rasikmeghaniશુષ્ક લાંબા મારગે
પુષ્પ સૌ છોડી ગોતે ખાર હવે
જિંદગીનો છે આ પ્રકાર હવે
બંધ હોંઠે જે ગીત ગાયા છે
એજ છે દર્દની પુકાર હવે
જેના માટે સપન મેં જોયા છે
કયારે એવી થશે, સવાર હવે
લાગણીના અનંત પડઘામાં
કેમ આપું તને પુકાર હવે
ઘાવ જેમાં ‘રસિક’ છુપાવ્યા’તા
એજ દામન છે તારતાર હવે
Mar 4th 2008rasikmeghaniશુષ્ક લાંબા મારગે
પુષ્પોની સાથે ખાર અને આપણે હતા
જીવનનો એ પ્રકાર અને આપણે હતા
કાળી ઘટા વધારે નિશા અંધકારને
ધુમ્મસ ભરી સવાર અને આપણે હતા
તો પણ હળી મળીને વિતાવ્યા દિ’ પ્રેમથી
સૌના અલગ વિચાર અને આપણે હતા
જોતા’તા ખ્વાબ રાતદિ’ તારાને તોડવા
જોબન યુવા ખુમાર અને આપણે હતા
આવેગપૂર્ણ મન હતું, દિલનો સાથ પણ
પાલવમાં અશ્રુધાર અને આપણે હતા
ચહેરા ઉપર ઉભરતા ગયા ચિન્હ એક-એક
એ કાળના પ્રહાર અને આપણે હતા
ચહેરો છુપાવી રોયા હતા જેમાં રાતદિ’
દામન એ તાર તાર અને આપણે હતા
ખરડાઈ લોહીથી ગયા પગ એટલે ‘રસિક’
જીવનની સંગધાર અને આપણે હતા
Mar 4th 2008rasikmeghaniશુષ્ક લાંબા મારગે
એજ બાકી રહી પ્રથા ઘરમાં
જુની દુનિયા મળી નવા ઘરમાં
દિલની દુનિયા વસાવવી પડશે
મન તો મૂંઝાશે એ વિના ઘરમાં
ખાલી દીવાલથી નહીં ચાલે
જોઈએં છતને બારણા ઘરમાં
બીજે આરામ એવો ક્યાં મળશે
જેવો એ મળશે આપણા ઘરમાં
દિલને દરિયા સમી ગહનતા દે
ઘરની વાતોને રાખવા ઘરમાં
રાખ સમ વાતને હવા દેતા
આગ લાગી જશે બધા ઘરમાં
વાટ જોવાનો છે ‘રસિક’ મારી
વાર લાગી અગર જવા ઘરમાં
Mar 3rd 2008rasikmeghaniશુષ્ક લાંબા મારગે
એણે કીધી કદી જો સાચી વાત
શૂળ પેઠે એ દિલમાં લાગી વાત
કાલે પરખી છે જેને દુનિયાએ
એજ આજે હજી છે સાચી વાત
સઘળે તારા ભરમને જાળવવા
કોઈ સામે ન કર તું મારી વાત
ચાર દિવાલ વચ્ચે રાખીને
ઘરમા દાટી બધીજ ઘરની વાત
તોય એની સજા હું પામ્યો છું
જોકે મારે હતી અજાણી વાત
કોઈ પૂછે વિયોગી દિલ માટે
એને કેજો ‘રસિક’ની સઘળી વાત
Mar 2nd 2008rasikmeghaniશુષ્ક લાંબા મારગે
તોફાન સામે વાર છું કરજો સજા મને
સંકટ હું ઝીલનાર છું કરજો સજા મને
ફરહાદ, દેવદાસ કે મજનું ભલે નથી
નખશિખ છતાંય પ્યાર છું કરજો સજા મને
કંટકના ઘાવ કારમા ઝીલીને ચૂર છું
પુષ્પોને ચાહનાર છું કરજો સજા મને
કાપે છે લોક તારા ગણી જેના માટે રાત
એ આશની સવાર છું કરજો સજા મને
જેને કદી મળે નહીં પાલવનો આશરો
હું એવી અશ્રુધાર છું કરજો સજા મને
દિલ છે અલિપ્ત મારૂં સદા ઈર્ષા દ્રેષથી
હું તો અખંડ પ્યાર છું કરજો સજા મને
વાચા ‘રસિક’ મળી ન કદી જે વિચારને
ખામોશ એ પુકાર છું કરજો સજા મને
Following is a quick typing help. View Detailed Help
Following preferences are available to help you type. Refer to "Typing Help" for more information.