“રસિક” મેઘાણીની ગઝલો

આંખ ભીની યાદ નીંગાળો હવે
ભીંત પરના ચિત્ર ખંખાળો હવે

ધીમે ધીમે આપણા સંબંધમાં
કેમ વધતો જાય વચગાળો હવે

સૌ સમયની પાંખ લઈ ઊડી ગયા
એટલે ખાલી થયો માળો હવે

ખાળવા હો જો તિમિરના વાદળો
કોડવાળા કોડિયાં બાળો હવે

રિક્તતાને ભીંત પરથી ટાળવા
ટોડલા પર યાદ ટીંગાળો હવે

પારધી તુજ નામે પણ ખાલી થશે
ચકલીઓનો ચિત્રમાં માળો હવે

વેદનાની વાટ બાળી રાતભર
મીણબતીને ન ઓગાળો હવે

ભીડમાં ખોવાઈ જા એની ‘રસિક’
એટલીયે છોડ જંજાળો હવે

No Comments »

યાદ નીંગાળો હવે-“રસિક” મેઘાણી