સમાયો છું
Jan 28th 2008rasikmeghaniભીની ભીની આંખો
તારી ચાહતમાં જો સમાયો છું
ખુદના માટે થયો પરાયો છું
રાત લાંબી છે ને તિમિરમય છે
ઝબકી ઝબકી હું ઓલવાયો છું
સાથ તારો ને મારો એમજ છે
જિંદગીભર તારો પડછાયો છું
મારી આંખો ને સ્વપ્ન એનું છે
રાત એ રીતથી જગાયો છું
મારા પોતાના ચહેરા જોઈ બધે
ઘાવ પામીને મુસ્કુરાયો છું
જિંદગી એમ આખી વીતી છે
ચહેરા જોઈને ભોળવાયો છું
પ્રેમ દીપક જલાવી ચાલ્યો ‘રસિક’
સૌના દિલમાં પછી સમાયો છું