“રસિક” મેઘાણીની ગઝલો

પુષ્પો    પરાગશે  ને   અમે  યાદ   આવશું
રંગો   નિખારશે  ને   અમે   યાદ   આવશું

કોઈ   મધુરી  યાદના   તું  મીઠા  ખ્વાબમાં
તોરણ   સજાવશે   ને  અમે   યાદ  આવશું

વીતી  જશે દિવસ બધા સૂરજની આસપાસ
સંઘ્યા  પછી   થશે  ને  અમે   યાદ  આવશું

કિલ્લોલ  કરતી  કોયલો  આંબાની  ડાળપર
ટૌંકાર    આપશે   ને  અમે   યાદ   આવશું

ભૂલેલ  યાદ ક્યાંક  સૌ સખીયોના   સંગમાં
કોઈ    સતાવશે   ને   અમે   યાદ   આવશું

પથરાળી  લાંબી વાટમાં  કાળી અમાસ રાત
તું   ડગલું   માંડશે  ને  અમે  યાદ   આવશું

ઘનઘોર કાળાં વાદળો ગાજ્યાં પછી ‘રસિક’
વરસાદ   આવશે   ને   અમે   યાદ  આવશું

No Comments »