“રસિક” મેઘાણીની ગઝલો

શ્વાસોમાં તું જ તું મળે એ તો લખ્યું તને
તારાથી પ્રેમ છે મને એ તો લખ્યું તને

પરદેશની ઉડાવી ગઈ આંધી દૂરદૂર
જખ્મો સજાવી પાંપણે એ તો લખ્યું તને

રસ્તામાં કાંટા વીણતા વીતી ગયો સમય
થાકી ગયા’તા છેવટે એ તો લખ્યું તને

વીતેલ યાદના બધે રસ્તા રહી ગયા
આંખો બિછાવી બારણે એ તો લખ્યું તને

બળતા બપોરે કેટલી વરસી રહી’તી લૂ
બેસીને રણના છાંયડે એ તો લખ્યું તને

વર્ષાની ઋત વસી ગઈ મુજ દિલની આસપાસ
અશ્રૂ વહાવી પાંપણે એ તો લખ્યું તને

કોઈ જવાબ એમનો આવ્યો નહિ ‘રસિક’
ખખડાવી થાકયા દ્વારને એ તો લખ્યું તને

No Comments »