કાગળ -‘રસિક’ મેઘણી
Feb 19th 2008rasikmeghaniશુષ્ક લાંબા મારગે
તને એથી મોડો મળેલો છે કાગળ
વિચારી વિચારી લખેલો છે કાગળ
કદી થાકવાનો નથી વાંચી વાંચી
એ તારા જો હાથે લખેલો છે કાગળ
છતાં પ્રેમની એમાં ધારા વહે છે
ભલે એ શિકાયત ભરેલો છે કાગળ
અહીં લખતા લખતા,ને ત્યાં વાંચી વાંચી
ઉભય અશ્રુથી તર કરેલો છે કાગળ
બધી યાદ તારી લખેલી છે દિલમાં
વગર વાંચે એથી પડેલો છે કાગળ
ઘણી વાટ જોઈ છે તારી કે જાણે
યુગો યુગ સુધી વિસ્તરેલો છે કાગળ
હવે કાંઈ એમાં નથી લખવા જેવું
બધુંયે લખીને ભરેલો છે કાગળ
‘રસિક’ થોડા શબ્દો લખી છોડી દીધું
ઘણું લખવા માટે બચેલો છે કાગળ
No Comments »